Logro Krusial den preparashon di skol sekundario SKAIH Pre – Universitario Èksamennan na inglés garantisá pa Caribbean Examinations Council

Na 2015 Gobièrnu di Kòrsou, pa medio di un dekreto gubernamental, a bai di akuerdo pa finansiá ampliashon di SKAIH ku un skol sekundario pa enseñansa general avansá riba nivel di HAVO/VWO na Papiamentu despues ku gobièrnunan konsekutivo a bai di akuerdo ku ampliashon di e skol.
Aktualmente ta hasiendo tur preparashon nesesario pa por kuminsá na ougùstùs 2018.
Un di e retonan ku direktiva a enkontrá tabata pa buska alternativa pa un eksamen ekivalente na HAVO/VWO ku ta prepará e alumnonan pa enseñansa superior ku ta di mesun nivel ku HAVO/VWO i ku ta rekonosé dor di enseñansa superior internashonal e.o. den nos region, Merka, Canada i Ulanda.

Direktiva di FSHP a disidí, despues di deliberashon intensivo i konseho pa tuma dos desishon klave:
1. Skohe Ingles komo idioma di instrukshon banda di Papiamentu pa e skol ku ta prepará alumnonan pa skol sekundario general pre -universitario.
2. Skohe pa prepará e alumnonan pa eksamen riba nivel sekundario general pre -universitario kuanan ta:
– CXC nivel C-SEC (Caribbean Examination Council- Certificate of Secondary Education )
– IB-D ( International Baccalaureate Diploma di IBO)

Diferente motibu a kondusí na e eskoho aki:
– e importansha grandi ku ingles ta hunga tantu lokal komo mundialmente i tambe na Ulanda den enseñansa superior pa kua ta prepará nos alumnonan.
– e ta mará na ròl ku idioma Ingles a bin ta hunga mas i mas den nos komunidat riba numeroso tereno bou di kua enseñansa , komersio , rekreashon i medionan sosial
– e importansha I nesesidat indispensabel di Ingles komo “Lenga Franca” pa nos komunikashon ku mundu eksterior pa nos eksistensia.

– Caribbean Examination Council ta un instituto di CARICOM ku ta responsabel pa eksamen di 250.000 alumno riba nivel sekundario tur aña .
– CXC su eksamennan ta ampliamente rekonosé pa institutonan di enseñansa superior internashonalmente entre otro Caribe, Merka, Canada, Inglatera i Ulanda.
– Nuffic-Europees Platform a balorá eksamen CXC-CSEC riba nivel di HAVO .
– Nuffic ta e instituto Ulandes ku ta balorá diploma.
– Ku CXC e alumno no ta keda sinta komo ku e sistema ta modular . E alumno ta prepará su mes pa un módulo den su mes “tempo”.
– “College van Examens” ku ta responsabel pa èksamennan di HAVO I VWO serka nos ta rekonosé ku e kalidat di konstrukshon i standarisashon di e eksamennan di CXC ta fuera di tur duda. (relato anual 2013, pág 18).
– IB-D e diploma di International Baccalaureate Organization ta balorá riba nivel VWO plùs pa NUFFIC . Na e mihó Universidatnan di mundu e diploma ta altamente rekomendá.

Pa por prepará introdukshon di SKAIH Pre -universitario direktiva a aprobá un programa di introdukshon di 17 proyekto di kua un di e proyektonan ta enserá prepará introdukshon di e kuríkulo ku ta basa riba e sistema di CXC.
E programa aki a keda entregá na Gobièrnu di Kòrsou pa duna ehekushon na e dekreto gubernamental di 2015.

Den kuadro di e trabounan di preparashon ku mester bai tuma lugá i pa sera konosí ku sekretariado di CXC, direktiva di FSHP i Sekretariado CXC a kumbiní pa tené kòmbersashonnan na Barbados kaminda a trata e proyekto a fondo.

Na e reunion a asistí staf kompleto di CXC konsistiendo di e máksimo miembro ehekutivo Dr. Glenroy Cumbertach, sostené dor di Dr. Stephen Savoury director operations, Dr Kemaul Persaud Director of Corporate Sevices , dr Rodney Payne i dr. Yolande Wright ámbos di büró di eksamen . Via skype a partisipá dr. Carol Granston (JAMAICA) ku ta hefe suplente di CXC i bou di kua FSHP lo kai direktamente. CXC a ratifiká nan desishon previo ku nan a palabrá ku defuntu Dr Frank Martinus pa sostené direktiva di FSHP riba tur faseta di nan programa eskolar pa logra SKAIH Pre -Universitario.
CXC ta en espera di firmamentu ofisial dor di Gobièrnu di Kòrsou di e MOU, ku CXC a entregá despues di deliberashonnan ku gobièrnu di Kòrsou aña pasá, di moda ku por determiná e struktura i kuminsá ku e proseso di koperashon.
Ku sertifikashon di SKAIH su eksamen i diploma na ingles bou di supervishon di CXC-CSEC, lo garantisá ku nos studiantenan ku kier sigui nan estudio na ingles pero alabes konservá nan idioma i asina hasi mihó konekshon ku mundu i haña entrada na enseñansa superior rònt mundu.

Direktiva di FSHP